ఫ్యాషన్ ప్రపంచంలో ఆధ్యాత్మికత.. కేన్స్ రెడ్ కార్పెట్‌పై బృందావనం.. చేతిలో భగవద్గీతతో అందరి దృష్టి ఆకర్షించిన భారతీయ కళాకారిణి!

ప్రతిష్ఠాత్మక కేన్స్ ఫిల్మ్ ఫెస్టివల్ రెడ్ కార్పెట్‌పై ప్రతి ఏటా ఎందరో తారలు తమ ఫ్యాషన్‌తో ప్రత్యేక ముద్ర వేస్తుంటారు. కొందరు సంప్రదాయ దుస్తుల్లో మెరిస్తే, మరికొందరు పాశ్చాత్య డిజైనర్ గౌన్లలో తళుక్కుమంటారు. అయితే, ఈసారి బృందావనానికి చెందిన కళాకారిణి ఆర్తి ఖేతర్‌పాల్ తన ప్రత్యేకమైన వేషధారణతో అందరి దృష్టినీ ఆకర్షించారు. ఫ్యాషన్ వేదికపై తన సంస్కృతి, విశ్వాసాలను గర్వంగా ప్రదర్శించి ప్రత్యేకతను చాటుకున్నారు.

ఆర్తి తన తొలి ప్రదర్శన కోసం బృందావనం థీమ్‌తో రూపొందించిన ప్రత్యేక లెహంగాను ఎంచుకున్నారు. ప్రముఖ డిజైనర్ సులక్షణ మోంగా తీర్చిదిద్దిన ఈ మస్టర్డ్-యెల్లో రంగు లెహంగా స్కర్ట్‌పై బృందావనానికి సంబంధించిన కళాకృతులను చేతితో చిత్రీకరించారు. దీనికి జతగా ఎంబ్రాయిడరీ చేసిన బ్లౌజ్, దుపట్టా ఆమె అందాన్ని మరింత పెంచాయి. బోల్డ్ రెడ్ లిప్స్, న్యూట్రల్ మేకప్‌తో ఆర్తి తన లుక్‌ను పూర్తిచేశారు.

ఆమె కేవలం దుస్తులతోనే కాదు, తన ఆభరణాలు, వెంట తెచ్చుకున్న వస్తువులతోనూ తన విశ్వాసాన్ని చాటుకున్నారు. ఆకుపచ్చ మీనాకారీ నెక్లెస్, చెవిపోగులతో పాటు ఓ కృష్ణ బ్యాగ్, చిన్న సైజు భగవద్గీత, తులసి మాలను చేతిలో పట్టుకుని రెడ్ కార్పెట్‌పై నడిచారు. ఇది ఆమె కృష్ణుడి పట్ల ఉన్న భక్తిని స్పష్టంగా చూపింది.

ఈ సందర్భంగా తన ఇన్‌స్టాగ్రామ్‌లో ఆర్తి భావోద్వేగ పోస్ట్ పెట్టారు. "దేవుడిని విశ్వసించే ప్రతి మనిషికి ఇది అంకితం" అని పేర్కొన్నారు. కృష్ణుడిని ప్రేమించడం నేర్పిన తన తల్లికి, వెన్నుదన్నుగా నిలిచిన సోదరుడికి, భారత్‌లో పనులను చూసుకుంటున్న సోదరికి ఆమె ధన్యవాదాలు తెలిపారు. ఈ ఏడాది కేన్స్‌లో తన తండ్రి సినిమా కూడా ప్రదర్శితమవుతోందని ఆమె వెల్లడించారు. గ్రామీ నామినేషన్ పొందిన 'సౌండ్స్ ఆఫ్ కుంభ' ఆల్బమ్‌లో ఆర్తి ఖేతర్‌పాల్ ఒక ఆర్టిస్ట్‌గా పనిచేయడం గమనార్హం. ఫ్యాషన్, గ్లామర్ మాత్రమే కాకుండా కేన్స్ వంటి అంతర్జాతీయ వేదికపై తన సంస్కృతిని గర్వంగా ప్రదర్శించి ఆర్తి ఎందరికో ఆదర్శంగా నిలిచారు.